Israel-Iran संघर्ष: इजरायलने केलेल्या हवाई हल्ल्यांमध्ये इस्लामिक रिव्होल्युशनरी गार्ड कॉर्प्स (IRGC) चे गुप्तचर प्रमुख ब्रिगेडियर जनरल मोहम्मद काजमी आणि त्यांचे सहकारी हसन मोहाकिक ठार झाले आहेत. या हल्ल्यांनंतर इराणचे सर्वोच्च नेते अयातुल्ला अली खामेनेई यांना राजधानी तेहरानजवळील भूमिगत बंकरमध्ये हलवण्यात आले. टाइम्स ऑफ इस्रायलच्या माहितीनुसार, इजरायलने त्यांना पहिल्या दिवशी लक्ष्य केलं नाही, जेणेकरून त्यांनी युरेनियम संवर्धन योजना थांबवण्याची संधी मिळावी.
—
IRGC च्या प्रमुखांची हत्या, इजरायली हल्ल्यांमुळे इराण हादरला
इजरायली संरक्षण दलाने (IDF) दिलेल्या माहितीनुसार, इराणमधील शस्त्रनिर्मिती केंद्रांवर मोठ्या प्रमाणावर हवाई हल्ले करण्यात आले. या कारवाईत IRGC, त्यांची कुद्स फोर्स आणि इराणी सैन्याच्या महत्त्वाच्या पायाभूत सुविधा नष्ट करण्यात आल्या.
—
तेहरानमधील हल्ल्यात तीन वरिष्ठ गुप्तचर अधिकारी ठार
IRGC संबंधित इराणच्या सरकारी तस्नीम न्यूज एजन्सीने सांगितले की, या हल्ल्यात एक तिसरे वरिष्ठ गुप्तचर अधिकारी मोहसिन बाघेरी हे देखील मारले गेले. या घटनेमुळे इराणच्या सैनिकी रचनेला आणि गुप्तचर यंत्रणेला मोठा धक्का बसला आहे.
—
सर्वोच्च नेते खामेनेई भूमिगत बंकरमध्ये सुरक्षित
इजरायली हल्ले सुरू झाल्यानंतर काही तासांतच खामेनेई यांना त्यांच्या कुटुंबासह तेहरानच्या लवीजान परिसरातील बंकरमध्ये हलवण्यात आले. यापूर्वीही एप्रिल 2024 आणि ऑक्टोबरमध्ये त्यांनी अशाच परिस्थितीत याच बंकरमध्ये आश्रय घेतला होता.