AI फोटो शेअर करून वाढले वाद
तेलंगणा कॅडरच्या आयएएस अधिकारी स्मिता सभरवाल यांनी 31 मार्च 2025 रोजी त्यांच्या सोशल मीडिया खात्यावर AI जनरेट केलेला एक फोटो पोस्ट केला होता. या फोटोमध्ये एक मोर आणि दोन हरणं आहेत, ज्यांच्यावर एक बुलडोजर वेगाने येताना दाखवले आहे. हा फोटो त्यांनी हैदराबाद विद्यापीठाजवळील कांचा गाचीबोवली येथील 400 एकर जागेच्या संदर्भात शेअर केला होता, जिथे आयटी पार्क उभारण्यावर वाद सुरू आहे. सुप्रीम कोर्टाने या बांधकामावर सध्या स्थगिती दिली आहे आणि अनेक विद्यार्थी व पर्यावरणतज्ज्ञही याला विरोध करत आहेत.
पोलीस नोटीस आणि स्मितांचा सवाल
या पोस्टमुळे स्मिता सभरवाल यांच्यावर चुकीची माहिती पसरवल्याचा आरोप ठेवत तेलंगणा पोलिसांनी त्यांना नोटीस बजावली होती. यावर प्रतिक्रिया देताना स्मिता म्हणाल्या होत्या की, त्यांना हेतुपुरस्सर लक्ष्य केले जात आहे. त्यांनी प्रश्न उपस्थित केला की, जर 2000 लोकांनी हा फोटो रीशेअर केला आहे, तर त्यांच्यावरही पोलिसांनी कारवाई करणार का?
बदललेल्या जबाबदाऱ्या
स्मिता सभरवाल सध्या YAT&C विभागाच्या मुख्य सचिव आणि पुरातत्व संचालक म्हणून कार्यरत होत्या. आता त्यांची बदली करून त्यांना तेलंगणा आर्थिक आयोगात सदस्य सचिव म्हणून नेमण्यात आले आहे. याआधी 2024 मध्ये त्यांनी YAT&C विभागात मुख्य सचिवपद स्वीकारले होते.
मुख्यमंत्र्यांच्या सचिवपदावरून बाहेर
बीआरएस सरकारच्या काळात स्मिता सभरवाल मुख्यमंत्र्यांच्या सचिवपदावर कार्यरत होत्या. मात्र काँग्रेस सरकार सत्तेवर आल्यानंतर त्यांना मुख्यमंत्री कार्यालयातून हटवून नव्या जबाबदाऱ्यांवर पाठवण्यात आले.
स्मिता सभरवाल कोण आहेत?
19 जून 1977 रोजी दार्जिलिंग, पश्चिम बंगाल येथे जन्मलेल्या स्मिता सभरवाल यांनी 2000 मध्ये UPSC परीक्षेत चौथी रँक मिळवून IAS पद मिळवले. प्रशिक्षणानंतर त्यांची नियुक्ती तेलंगणा कॅडरमध्ये झाली. आज त्या राज्यातील ज्येष्ठ आणि प्रभावी IAS अधिकाऱ्यांपैकी एक मानल्या जातात
