झहीर खानकडून ऋषभ पंतला पाठिंबा
आयपीएल टी-20 स्पर्धेत ऋषभ पंत यंदा कर्णधार म्हणूनच नव्हे, तर फलंदाज म्हणूनही अपयशी ठरला आहे. रविवारीच्या सामन्यातही त्याचं अपयश सुरूच राहिलं. मुंबई इंडियन्सविरुद्ध 216 धावांचा पाठलाग करताना चौथ्या क्रमांकावर आलेल्या पंतने फक्त 4 धावा काढल्या. सामन्यानंतर ड्रेसिंग रूममध्ये झहीर खानने पंतची पाठ थोपटली.
प्रेस कॉन्फरन्सदरम्यान, लिलावात सर्वाधिक किंमत मिळाल्याने ऋषभवर दबाव वाढल्याची चर्चा रंगली. मात्र भारताचा माजी वेगवान गोलंदाज झहीर खानने पंतच्या नेतृत्व क्षमतेवर विश्वास दाखवला आहे.
जागा बदलूनही पंत अपयशी
पूर्वी सातव्या स्थानी फलंदाजीसाठी उतरवलेला पंत, मुंबईविरुद्ध चौथ्या क्रमांकावर आला होता. मात्र रिव्हर्स स्वीप खेळताना तो बाद झाला. लिलावातील प्रचंड किंमतीमुळे ऋषभवर मानसिक ताण वाढल्याची टीका होत आहे.
यावर झहीर खान म्हणाला, “पंत चांगल्या पद्धतीने नेतृत्व करत आहे. मध्यफळीतील फलंदाजाकडून मोठ्या खेळीची अपेक्षा असतेच. अंतिम टप्प्यात संघ नक्कीच चांगला खेळेल,” असा विश्वास त्याने व्यक्त केला.
ऋषभच्या खराब फॉर्मवरही झहीरचं समर्थन
या मोसमात ऋषभने 10 सामन्यांत केवळ 110 धावा केल्या आहेत. सहा वेळा तर तो 10 धावांचीही मर्यादा गाठू शकला नाही. चेन्नई सुपर किंग्सविरुद्ध 63 धावांची एकच चांगली खेळी त्याने केली.
मुंबई इंडियन्सविरुद्ध 54 धावांनी झालेल्या पराभवाच्या सामन्यात विल जॅक्सने त्याला केवळ चार धावांवर बाद केलं.
दरम्यान, लखनऊ सुपर जायंट्सचे मार्गदर्शक झहीर खानने स्पष्टपणे ऋषभला पाठिंबा दर्शवला आहे. “कर्णधार म्हणून तो सर्व अपेक्षा पूर्ण करतोय. पराभव आणि त्याची फलंदाजी यांचा संबंध जोडणं चुकीचं आहे. नेतृत्वात तो खूप मेहनत घेतोय आणि संघात एकजुटीचं वातावरण तयार करतो,” असं झहीर म्हणाला.
झहीर खानने काय म्हटलं?
झहीर म्हणाला, “कर्णधार म्हणून ऋषभ उत्तम कामगिरी करतोय. मधल्या फळीतही तो महत्त्वाचा आहे. मला खात्री आहे, तो लवकरच अपेक्षित कामगिरी करेल. फक्त चांगल्या सुरुवातीची गरज आहे.”
लिलावातील मोठ्या रकमेमुळे त्याच्यावर दबाव आहे, पण त्यामुळे त्याची कामगिरी घसरतेय, असा आरोप झहीरने फेटाळला. “पंत कर्णधार म्हणून संघासाठी फार महत्त्वाचा आहे आणि त्याच्याकडून मोठी कामगिरी लवकरच पाहायला मिळेल,” असेही झहीरने सांगितले
